आता एटीएममधून पैसे काढणे महागणार आहे. पुढील महिन्यापासून म्हणजेच जानेवारीपासून मोफत व्यवहारांची मासिक मर्यादा ओलांडल्यास ग्राहकांना 20 रुपयांऐवजी 21 रुपये प्रति व्यवहार द्यावे लागतील. अॅक्सिस बँकेने सांगितले की, आरबीआयच्या मार्गदर्शक तत्त्वांनुसार, अॅक्सिस बँक किंवा इतर बँकेच्या एटीएममधील विनामूल्य मर्यादेपेक्षा जास्त आर्थिक व्यवहार शुल्क रुपये 21 + जीएसटी असेल.
नवीन एटीएम व्यवहार शुल्क
पुढील महिन्यापासून, ग्राहकांनी मोफत व्यवहारांची मासिक मर्यादा ओलांडल्यास 20 रुपयांऐवजी 21 रुपये प्रति व्यवहार द्यावे लागतील. “खर्चातील सर्वसाधारण वाढ लक्षात घेता आणि इंटरचेंज शुल्कासाठी बँकांना भरपाई देण्यासाठी, त्यांना प्रति व्यवहार 21 पर्यंत ग्राहक शुल्क वाढवण्याची परवानगी मिळाली आहे. ही वाढ 1 जानेवारी 2022 पासून लागू होईल,” RBI ने एका निवेदनात म्हटले आहे.
किती मोफत व्यवहार
ग्राहक त्यांच्या स्वत:च्या बँकेच्या एटीएममधून दर महिन्याला पाच मोफत व्यवहारांसाठी (आर्थिक आणि गैर-आर्थिक व्यवहारांसह) पात्र राहतील. मेट्रो शहरातील केंद्रांमधील इतर बँकेच्या एटीएममधून तीन आणि नॉन-मेट्रो केंद्रांवर पाच विनामूल्य व्यवहार करू शकतील. याशिवाय, मध्यवर्ती बँकेने बँकांना आर्थिक व्यवहारांसाठी प्रत्येक व्यवहारासाठी इंटरचेंज फी 15 रुपयांवरून 17 रुपये आणि सर्व केंद्रांमधील गैर-आर्थिक व्यवहारांसाठी 5 रुपयांवरून 6 रुपये करण्याची परवानगी दिली होती. हे 1 ऑगस्ट 2021 पासून लागू झाले.